Gizartea -
Astelehenetik aurrera
Jaizkibel ingurukoek euren telebista sintonizatu beharko dute gaur
Gipuzkoako udalerri gehieneko eta Bizkaiko zenbait udalerriko herritarrek telebista sintonizatu beharko dute gaurtik aurrera Lur-Telebista Digitalaren kanal guztiak ikusi ahal izateko.
Erredakzioa
Jaizkibeleko zentro-igorletik telebista-seinalea jasotzen duten herritarrek Lur-Telebista Digitalaren (LTD) kanal guztiak berriro sintonizatu beharko dituzte astelehen honetan. Egokitzapenak Gipuzkoako udalerri gehienei eta Bizkaiko zenbait udalerriri eragiten die.
Industria Ministerioak ohar baten bidez jakitera eman duenez, zonalde horretako biztanleek berriro hartu beharko dituzte LTDko kanal guztiak telebista normaltasunez ikusi ahal izateko.
Zonalde horrek Donostia eta Irun hartzen ditu. Bizkaian, berriz, Amoroto, Berriatua, EA, Elantxobe, Ibarrangelu, Ispaster, Lekeitio eta Mendexa udalerriak hartzen ditu.
Halaber, Industria Ministerioak azaldu duenez, erabiltzaileek ezin badute kanalen bat ikusi, eta antena kolektiboa bada, antena-jartzaile bati deitu behar diote, antenari dagokion egokitzapena egin diezaioten.
Auzokideen komunitateek ekainaren 30erainoko epea dute, antenetan behar beste egokitzapenak egiteko, Gobernuak eskainitako 280 euroko diru-laguntza eskatu ahal izateko.
