Gizartea -
Lapurdi
Azaroaren 3an kenduko diote argindarra Ziburuko ikastolari
Ikastola eta eskola aldi berean ezin dituztela argindarrez hornitu argudiatuta hartu du erabakia Herriko Etxeak. Horren aurrean, manifestazioa deitu dute azaroaren 8rako.
Erredakzioa
Ziburuko Herriko Etxeak Kaskaroteniako ikastolari azaroaren 3an argindarra kenduko diola jakinarazi du. Oraingoan, argudioz aldatu behar izan du, eskola publikoaren lanak amaituak baitira; eta ikastola eta eskola aldi berean ezin dituztela argindarrez hornitu argudiatu du.
Gauzak horrela, Guy Poulou auzapeza urrunegi joan dela iritzita, Euskal Herriko Ikastolen Elkartearen babesarekin, manifestazioa deitu dute azaroaren 8rako.
Orain arte auzapezak baliatzen zuen argudioa zen Kaskaroteniak eskola publikoaren lanei traba egiten ziela. Kontua da lanak amaituak direla, eta azaroaren hirurako itzultzen direla eskolako ikasleak.
Seaskak sei proposamen egin ditu, eta Sokoakoan du interes handiena. Baina Guy Poulouk aukera bakarra eman die, autopistatik gertuegi eta herritik urrunegi omen dagoen gune bat, eta Seaska ez dago leku hori onartzeko prest.
