700 bat etorkin Melillara sartzen saiatu dira, eta 80k lortu dute

Saharaz hegoaldeko 700 bat etorkin Melillako hesia gainditzen saiatu dira, bi saiakeratan, eta 80 batek lortu egin dute.

Melillako Gobernu Ordezkaritzaren arabera, lehenengo saiakera 06:05ean izan da, Txinatar Auzoa eta Farhana muga-postuen inguruko hesian.

Etorkinen lehenengo taldea 500 bat pertsonak osatu dute, eta bi taldetan banatu dira hesia gainditzeko, bakoitza kontrako norabideak hartuz. Horietatik, 30 batek lortu du Melillara sartzea.

Zazpi ordu hesian igota

Bigarren saiakera ordubete beranduago burutu dute, 07:05etan, Urre Ibaiaren inguruan. Horretan, 200 bat etorkinek parte hartu dute.

Ordezkaritzaren arabera, horietako bat ere ez du lortu hesia gainditzea, baina 50 bat hesian igo dira.

Etorkinak Melillako hesian igota. Argazkia: EFE

Azkenik, Guardia Zibilak etorkin horiei sartzen utzi die, Melillako hesian igota zazpi ordu eman eta gero.

Poliziako iturriek jakitera eman dutenez, etorkinak alanbra-hesitik jaisten utzi dituzte guardia zibilek; izan ere, bigarren hesian igota zeuden, hau da, Espainiatik gertuen dagoen hesian. 50 pertsonak Etorkinen Egonaldirako Zentrora (CETI) eraman dituzte.