Osasun publikoaren aldeko 'marea zuriak' kaleak hartu ditu berriro

350 lagun inguruk giza-katea egin dute Iruñean osasun publikoaren pribatizazioaren aurka, Nafarroako Osasunaren Plataformak deituta eta Madrilen izango den 'marea zuria'ri atxikimendua adierazteko.

Protestan parte hartu dutenek irakaskuntza publikoaren aldeko oihuak bota dituzte, "eskubide unibertsala delako". Patricia Ruiz antolatzaileen bozeramaileak esan duenez, "Madrilgo marea zuriak osasun zerbitzuen pribatizazioa salatu nahi du".

Nafarroari dagokionez, "hainbat zantzuek agerian utzi dutenez, zenbait zerbitzu publiko pribatizatzen ari dira". Ruizek azpimarratu duenez, "espero dut herritar guztiek oihu honen alde egitea".

Tolosan ere osasun zerbitzuko pribatizazioaren aurkako elkarretaratzea izan da.

Manifestazioa Madrilen

Halaber, osasun publikoaren milaka langilek eta erabiltzailek 'marea zuria'rekin bat egin dute Madrilen. Manifestazio jendetsua 12:00etan hasi da. Manifestariak hainbat zutabetan daude banatuta, eta Cibeles Plazan elkartuko dira Solera abiatzeko.

Hainbat elkartek osatzen dute Osasun Publikoaren Defentsarako Mahaia: Madrilgo Auzokideen Elkarteko Lurralde-Federazioa, Osasun Publikoaren Defentsarako Elkarteen Federazioa, Osasun Arloko Mahaian dauden sindikatuak (SATSE, CCOO, AMYTS, CSIT-UP, UGT, USAE), Osasunaren Langileen eta Erabiltzaileen Batzorde-Plataforma, Madrilgo Mediku Espezialisten Elkartea, eta alor publikoaren aldeko hainbat plataforma.

Madrilgo mobilizazioa beste hainbat hiritan ere egin dute, Osasun Publikoaren Defentsarako Mahaian erabaki ostean. Izan ere, urte honetan beste bi 'marea zuri' egin dituzte Espainiako hiriburuan.

'Osasuna ez dago salgai, defendatu behar dugu' leloa duen pankarta izan da manifestazioaren buruan. Gainera, bestelako leloak ere izan dira irakurgai: 'Zure osasuna, salgai', 'Zure osasuna lapurtu nahi dute' edo 'Osasunagatik'.

Halaber, manifestariek txilibituak erabili dituzte eta hainbat oihu bota dituzte: tartean, 'Bai, lortu dezakegu', 'Osasun publikoa', 'Lasquetty, entzun ezazu, osasunaren alde ari gara borrokan', 'Aurrera osasuna', 'Eurovegas baino, erizainak'.

Gatazka luzatzea

Bestalde, Javier Fernandez-Lasquetty Madrilgo Osasun kontseilariak esan duenez, gaurko 'marea zuria'k "gatazka luzatzea du helburu, eta deialdia egin dutenen mesederako da". "Martxaren antolatzaileek protagonista izaten jarraitu nahi dute, interes pertsonalak eta gizartearen interesak nahastu dituzte", salatu du Fernandez-Lasquettyk, "eta hori iruzur egitea da".

Horren harira, 'marea zuria'ren antolatzaileek salatu dutenez, "Europako eraginkorrenetarikoa da Espainiako eta Madrilgo osasun sistema, eta hauteskundeetan irabaziak lortzearren ezin da pribatizatu. Gatazka hau haiek eragin dute".

Halaber, Jaime Cedrun Madrilgo CCOOko idazkari nagusiak adierazi duenez, "ez dago irtenbiderik, gatazka oraindik mantentzen da". Horren aburuz, Madrilgo Gobernuak proposatutakoak "porrota ekarriko du".