Mendia: 'Gobernu zentralak asmo baten aurkako helegitea aurkeztu du'

Idoia Mendia jarduneko Eusko Jaurlaritzako bozeramaileak adierazi duenez, funtzionarioen Gabonetako aparteko ordainsaria emateko Jaurlaritzaren erabakiak bultzatuta, Rajoyren Gobernuak Auzitegi Konstituzionalaren aurrean aurkeztutako "badaezpadako" eskumen-gatazkak "ezagututako mugak gainditzen ditu".

Gobernuak "asmo baten aurkako helegitea aurkeztu du", azaldu du Mendiak, "ez dugu akordiorik lotu, ondorioz, ez dago salatu daitekeen administrazio-egintzarik".

Radio Euskadik zabaldutako hitzen arabera, oraindik ordainsaria ordaintzeko asmoa dutela azpimarratu du sozialistak, "araudia betetzea besterik ez zaigu geratzen". Halaber, Gobernu zentralak "txantaia" erabili izana salatu du.

Celaa: 'Legeak gure asmoa babesten du'

Bestalde, Radio Euskadin eskainitako adierazpenetan Isabel Celaa jarduneko Hezkuntza sailburuak esan duenez, "ez dakit zeren aurka jarriko du helegitea PPko Gobernuak, orain arte funtzionarioen ordainsaria ordaintzeko asmoa baino ez adierazi dugulako". "Arauen aurka jar daitezke helegiteak, baina ez asmoen kontra: horra hor guk adierazi duguna", azaldu du.

Hala ere, Rajoyren Gobernuak hartutako erabakiak ez du Eusko Jaurlaritzaren asmoa aldatuko, Celaaren arabera, legeak haien asmoa babesten duelako. "Funtzionarioei ordainsaria emateko asmo irmoa dugu oraindik ere, gure araudiak hala babesten duelako", ondorioztatu du sailburu sozialistak.