Kaleratzeak Stop: 'Amaiaren heriotzak ezin du zigorrik gabe geratu'

"Amaia Egañaren heriotza zigorrik gabe ez geratzea" eskatu du Bizkaiko Stop Kaleratzeak erakundeak. Egañak bere buruaz beste egin zuen ostiralean, bere etxetik atera behar zutenean. Horrez gain, Amaiaren oroimenez borrokan jarraitzeko eskatu diete herritarrei.

Larunbat goizean pintadak agertu dira EAEko zenbait bankuko bulegotan, gaztelaniaz eta euskaraz, bankuei "hiltzaileak" esanda, Amaiaren hilketa eragitea egotzita. Halaber, etxegabetze gehiago ez egiteko eskatu dute.

Marta Uriarte erakundeko bozeramaileak prentsa oharra bidali die hedabideei ostiraleko "egun gogor eta tragikoa" aztertzeko.

Kaleratzeak Stop erakundeak familiaren "mina errespetatzeko" eskatu du, eta "politikoei moratoria abian jartzeko" exijitu diete, lehenbailehen, etxegabetze gehiago egon ez daitezen.

"Herriak gaitzespena agertu du"

Era berean, Marta Uriartek Amaia Egañaren heriotzagatik egindako elkarretaratzeak eta manifestazioak azpimarratu ditu, bai Barakaldon eta bai gainontzeko udalerrietan. "Herriak gaitzespena eta gertatutakoak eragindako amorrua agertu du".

Ondorioz, herritarrei dei egin die, "Amaiaren alde indarrak batzeko".