Rajoyk ez du erreskatea 2012an eskatzea aurreikusten

Rajoyk ez du 2012an erreskatea eskatzea aurreikusten. Gobernuko presidentearen taldeko iturriek adierazi dutenez, ez da erreskaterik eskatu beharko urtea amaitu baino lehen, "hondamendirik egon ezean", zehaztu dute.

Astelehenean, Mario Monti Italiako lehen ministroarekin bildu ostean, Mariano Rajoyk jada iragarri zuen ez duela ezinbesteko ikusten erreskatea eskatzea momentu honetan.

Azken asteetan asko espekulatu da Espainiak laguntza noiz eskatuko duen, baina Gobernuko iturriek berretsi dutenez, epe motzera ez da aurreikusten, are gehiago, arrisku-sariak egun dagoen bezala jarraitzen badu eta izugarri igotzen ez bada.

Halaber, erreskateak ez dituela euroguneko arazoak konpontzen adierazi dute, eta lehentasuna Europako integrazioan aurrerapausoak ematen jarraitzea dela gaineratu dute, batik bat, zerga eta bankuen batasunean.