Krisi Ekonomikoa -
Seigarren erkidegoa
Andaluziak ofizialki eskatu du 4.900 milioi euroko erreskatea
Halaber, zorraren muga igotzeko akordioa lortu du Rajoyren Gobernuarekin. Astearte honetan, 568 milioi euro jasoko ditu Kataluniak.
Erredakzioa
Andaluziako Gobernuak Erkidegoen Likideziarako Funtsara jotzea eskatu du ofizialki, 4.906 milioi euroko laguntza ekonomikoa jasotzeko.
Halaber, zorraren muga BPGaren % 15,3 eta % 15,1 bitartean kokatzeko akordioa lortu du Mariano Rajoyren Gobernuarekin, Carmen Martinez Aguayo Andaluziako Ogasun kontseilariak aurreratu duenez.Cristobal Montoro ministroaren konpromisoa dute, baina datozen egunotan argituko dute muga zehatza, Martinez Aguayok azaldu duenez.
Seigarrena
'Seguraski' 4.906 milioi euroko erreskatea eskatuko zuela iragarri zuen joan den hilean Andaluziak, eta hala izan da. Beraz, Gobernuari erreskatea eskatu dion seigarren erkidegoa da. Aurretik Kataluniak (5.000 milioi), Valentziak (3.500 milioi), Murtziak (641 milioi), Gaztela Mantxak (848 milio) eta Kanariak ere eskatu izan dute.
568 milioi euro, Kataluniarentzat
Astearte honetan 568 milioi euro jasoko ditu Kataluniak Erkidegoen Likideziarako Funtsatik, Antonio Beteta Administrazio Publikoetako Estatu idazkariak azaldu duenez. Aurretik 471 milioi euro jaso izan ditu, zorrari aurre egiteko. Guztira, beraz, 1.039 milioi euroko laguntza da orain artekoa, Kataluniak eskatutako 5.023 milioi euroko erreskatetik.
