Gobernuak baieztatu egin du argindarra % 4 edo 5 garestituko dela

Azken baliabideko tarifa elektrikoa (TUR), Espainian 20 milioi erabiltzaile dituena, % 4 eta % 5 artean garestituko da uztailetik aurrera, Jose Manuel Soria Industria ministroak jakitera eman duenez.

Soriak Kongresuko korridorean azaldu duenez, prezioaren garestitzea tarte horretan kokatuko da, baina "%4 tik gertuago".

Industria ministroaren esanetan, atzoko enkantearen ondoren (energiaren kostua % 9,5 igo zen), erreziboaren beste osagarriren bat jaistea da tarifa ez garestitzeko aukera bakarra, Gobernuak ezartzen dituen bidesariak, hain zuzen ere.

Horren harira, Soriak esan du ezin direla bidesari horiek merkatu, horiekin ordaintzen baitira elektrizitatea hornitzeko kostuak, eta bestela tarifaren defizit arazoa okertuko litzateke.

Martxoko berrikuspenean, Espainiako Gobernuak argindarraren prezioa % 7 garestitu zuen batez beste.