Arrisku-sariak maximo historikoekin itxi du: oinarrizko 543 puntu

Hamar urterako bonu espainiarraren errentagarritasunak % 6,87ko mailan amaitu du saioa, atzoko % 6,91ko mailatik behera, baina adituek kritikotzat jotzen duten % 7tik gertu.

Arrisku-sariak oinarrizko 55 puntu gehitu ditu, Eurotaldeak Espainiako bankuei laguntzea erabaki izanak eta arriskuak neurtzen dituen Moody's agentziak Espainiari nota jaistea erabaki izanak erabat baldintzatu duten aste honetan.

Euroa 1,26 dolarrean dela, Alemaniako bonuak (hori erabiltzen da oinarri gisa) % 1,44ko interesarekin itxi du saioa.

Testuinguru horretan, administrazio publiko guztien zorra % 5,39 igo da 2012ko lehen hiruhilekoan, 2011ko itxierako indizearekin alderatuta, eta 774.549 milioi eurora (BPGaren % 72,1) iritsi da, serie historikoaren mailarik altuenera.

Italiako arrisku-sariak oinarrizko 15 puntu egin du behera gaur, eta 449 puntuan itxi du saioa. Irlandakoak 595 puntuan itxi du gaur; Portugalgoak, 909 puntuan; eta Greziakoak, 2.569 puntuan.