Ekonomia -
2011ko defizita
Rajoyk garrantzia kendu dio defizitaren desbideratzeari
Presidenteak nabarmendu duenez, “gardentasuna” funtsezkoa da. Defizitaren berrikuspena egiaztatzera etorriko diren funtzionarioen harian, berriz, horiek ez dutela "batere" kezkatzen esan du Rajoyk.
Erredakzioa
Mariano Rajoy Espainiako Gobernuko presidenteak adierazi duenez, defizita murrizteko Gobernuaren eta Autonomia Erkidegoaren arteko "akordio garrantzitsua legealdi honetako gertaera nagusiena da". Halaber, defizitzaren gorabeherak aztertzeko Europako Batzordeak Espainiara bidaliko dituen langile publikoek ez diote "inolako kezkarik" eragiten nabarmendu du.
"Non gauden orain badakigu eta hortik aurrera, eraikitzeko unea da", esan die Rajoyk kazetariei NATOko goi-bileran parte hartzeko Chicagora iritsi denean.
Europako Batzordeak Espainiara Eurostateko funtzionarioak bidaltzea erabaki du, defizit publikoak 2011n izandako igoera berrikustea egiaztatzeko, lau hamarren igo baita (Barne Produktu Gordinaren % 8,5etik % 8,9ra, hain zuzen). Presidentearen esanetan, horrek ez du "batere" kezkatzen, "Europar Batasuneko herrialde guztietan ohikoa baita eta beti egin baita horrela".
Rajoyk azaldu duenez, desbideraketa hau "merkataritzako defizitaren" ondorioz izan da, "antza, tiraderetan gordeta zeuden fakturengatik". Izan ere, Gobernuak hornitzaileentzako martxan jarritako planari esker, "orain faktura horiek kobratu ahal izango dituzte".
"Espainian urteetan ezkutuko defizita egon da sarritan, faktura anitz egon direlako hortik sakabanatuta, ez aurrekontuek ez Estatuko kontuek jaso ez zutenek, baina hornitzaileentzako planari esker, orain azalean geratu dira", azpimarratu du Rajoyk. "Ezin dugu ez daukaguna xahutu, finantziazioa lortzea oso zaila baita eta diru-sarrerekin moldatu behar garelako", gaineratu du.
Hollanden adierazpenei buruz
Ostiral honetan, François Hollande Frantziako presidenteak Espainiako bankuak birkapitalizatzea "desiragarria" izan litekeela esan zuen eta, horren harira, haren desadostasuna erakutsi du Rajoyk. "Hollandek ez daki nolakoa den Espainiako bankuen egoeraz baina hori esan badu, baliteke guk ez dauzkagun zenbait datu izatea", esan du.
