Grezia eurogunean mantenduko dela uste du Europar Batzordeak

Grezia eurogunean mantenduko dela uste du Europako Batzordeak, beti ere euroguneko herrialdeekin hartutako konpromisoak betetzen baditu.

"Itxaroten ari gara, baina uste dugu Greziak konpromiso horiek bete egingo dituela", adierazi du Pia Aherenkilde Europar Batzordeko bozeramaileak, agerraldi batean.

"Greziaren etorkizuna eurogune barruan ikusten dugu. Grezia euroan jarraitzea nahi dugu", azpimarratu du. "Grezia eurogunearen barruan mantentzeko gure eskuan egon den guztia egin dugu".

Jose Manuel Durao Barroso Europar Batzordeko presidenteak adierazpen polemikoak egin zituen iragan astean, Italiako telebista kate batean: klub bateko kide batek klub horretako baldintzak urratu egiten dituenean klub horretatik kanpo egon behar dela esan zuen.

Gaur, Ahrenkildek adierazi du hitz horiek "orokorrak" izan zirela eta Greziari buruz ez zuela adierazpenik egin.