Ekonomia -
Ministroen Kontseilua
Gobernuak Argentinako biodiesel inportazioak mugatzea onartu du
Espainiak 750 milioi euroko balioa duen biodiesela inportatu zuen iaz Argentinatik.
Erredakzioa
Jose Manuel Soria Industria, Energia eta Turismo ministroak ministro-agindu bat aurkeztu du Ministroen Kontseiluan, Espainiako fabriketan biodiesela ekoizteko kuotak ezartzeko. Horrela, produktu findua Argentinatik inportatzea murriztuko da.
Biodiesela ekoizteko kuotak aginduta biodiesela Argentinatik inportatzea murriztuko du. Iaz Espainiak bioerregai horren 719.473 tona erosi zizkion Argentinari (Estatuan urtero kontsumitzen diren 1,6 milioi tonen ia erdia), 750 milioi euro ordainduta.
Ministroen Kontseiluaren osteko prentsaurrekoan Soraya Saenz de Santamaria Gobernuko presidenteordeak esan duenez, neurri hori Argentinak YPFren % 51 desjabetzeko erabakiari erantzuteko hartu duten neurrietako bat da.
"Ministroak gaur sinatuko du araua eta bihar argitaratuko dute Estatuko Aldizkari Ofizialean", azaldu du. "Neurri horrek Espainiako eta Europar Batasuneko enpresei (biodiesela) fintzeko lanetan laguntzea du helburu, eta fintze prozesua biodiesela baldintza lehiakorretan eskaintzeko moduan utzi nahi du", gaineratu du.
Gobernuak "diplomazia mailako neurriak eta ekimenak bilatzen jarraituko du foro guztietan", Gobernuaren "eginbeharra" baita "espainiarren eta akziodun txikien interesak babestea".