Ekonomia -
Goi-bilera Bruselan
Europar Batasuneko 25 estatu kidek itun fiskala sinatu dute
Erresuma Batua eta Txekiar Errepublika ez beste herrialdeek konpromisoa hartu dute aurrekontuen egonkortasunarekin.
Erredakzioa
Europar Batasuneko 25 estatu kidek, hots, denek Erresuma Batua eta Txekiar Errepublika izan ezik, itun fiskala sinatu dute gaur, Aurrekontuen zorroztasunarekin konpromisoa idatziz agertzeko.
Herman Van Rompuy Europako Kontseiluko presidenteak adierazi duenez, ituna "urrats garrantzitsua" da "zor subiranoaren krisia berriz ez errepikatzeko".
Mariano Rajoy Espainiako Gobernuko presidentea zortzigarren buruzagia izan da sinatzen.
Itun honekin, estatu kideek "urrezko araua" deritzona euren legedietan gaineratu beharko dute.
Gobernuaren iturriek azaldu dutenez, Espainia "ikasle aurreratua" da kontu honetan, irailean onartu baitzuten Konstituzioan gaineratzea, PSOEk eta PPk adostutako "erreforma espres" bati esker.
Itun fiskala indarrean sar dadin, 12 estatu kidek berretsi beharko dute.
"Urrezko araua" legedi nazionaletan islatzen ez duten estatu kideei BPGren % 0,1 arteko isunak ezarri ahalko dizkiete.
