Ekonomia -
Krisi ekonomikoa
Espainiako Gobernuak neurri berriak iragarriko ditu ostegunean
Ogasun ministroak azaldu duenez, Espainiako Gobernua defizit publikoaren "zauria ixteko" premiazko neurri ekonomiko berriak ari da prestatzen. Montorok ez ditu hauen nondik norakoak aurreratu.
Erredakzioa
Cristobal Montoro Ogasun eta Administrazio Publikoen ministroak astelehen honetan azaldu duenez, defizit publikoaren "zauria ixteko" premiazko neurri ekonomiko berriak prestatzen dabil Espainiako Gobernua, datorren osteguneko Ministroen Kontseilura eramateko asmoz. Hala ere, momentuz Montorok ez ditu hauen nondik norakoak aurreratu.
Bere saileko Estatuko hiru idazkariek kargu berriaz jabetzeko ekitaldia bitartean Montorok azaldu duenez, Espainian "erabakiak hartzeko gai den Gobernu bat" dagoela erakutsiko diete neurri hauek "nazioarteko bazkideei eta gainontzeko Europako herrialdeei".
Azken Ministroen Kontseiluan adostutako zerga igoerari dagokionez Montorok aitortu duenez, erabaki zaila baina beharrezkoa izan da hazkunde ekonomikoa sustatzeko, enplegua sortzeko, zerbitzu publikoak finantzatzeko eta lurralde batasuna mantentzeko.
Langile publikoen soldatetan egindako murrizketari dagokionez, langileria publiko eraginkorra behar da, zerbitzu publikoen bitartez, herritarren "beharrei" benetan erantzuna emateko.
