Ekonomia -
Greziako krisia
Greziak soldatak eta pentsioak urriraino ordaindu ahal izango ditu
Atenaseko Gobernuak higiezinen gaineko zerga berri bat ezartzea eta goi-funtzionarioen soldatak murriztea erabaki duela jakinarazi du.
Erredakzioa
Filipos Sajinidis Greziako Finantza idazkariaren hitzetan, Greziak urriraino soilik ordaindu ahal izango ditu Estatuko soldatak eta erretiro-pentsioak. Hori dela eta, nazioarteak 2010eko maiatzean onartutako 110.000 milioi euroko laguntzaren seigarren zatia ematea ezinbestekoa da.
Egoera horren aurrean, Greziako hedabideek Nazioarteko Diru Funtseko, Europako Banku Zentraleko eta Europar Batasuneko ikuskatzaileen itzulera eskatu dute gaur.
Atenaseko Gobernuak iragarritako azken neurriak higiezinen gaineko zerga bat eta goi-funtzionarioen soldatak murriztea dira.
Ildo horretan, Greziako Finantza ministroak azaldu duenez, batez beste 4 euro eskatuko dituzte metro karratuko; gutxienez 50 zentimo (gune txiroenetan) eta gehienez 10 euro (gune dirutsuenetan).
Ildo horretan, Greziak bizi duen atzeraldia (BPGren % 5) uste baino handiago dela aitortu du; izan ere, aurreikuspenek % 3,8n kokatu zuten BPG. Hori dela eta, ezohiko Ministro Kontseiluak ahalegin nazionala egin behar dela iragarri du.
Bestalde, Olli Rehn EBko Ekonomia komisarioak ekimena txalotu eta helburu fiskalak betetzeko bidean aurrerapausotzat jo du.
