Iruzurraren aurkako neurriak adostu nahi ditu Lopezek Aldundiekin

Bizkaiko, Arabako eta Gipuzkoako Aldundiekin iruzur fiskalaren aurkako neurriak adostea espero du Patxi Lopez lehendakariak gaur hasiko duten bilera sortan.

Idoia Mendia bozeramaileak iragarri duenez, lehendakaria "pozik eta itxaropentsu" joango da hiru bileretara. Hainbat gaitan "bat etorriko" direla uste du Patxi Lopezek, "diagnosi beretsua" egiten dutelako.

EAEko zerga-sistemaren zuzentasuna eztabaidatzea proposatuko die lehendakariak ahaldun nagusiei, "bikoiztasunak eta eraginkortasun-ezak saihesteko asmoz". Bileretara Jose Luis Bilbao (EAJ), Martin Garitano (Bildu) eta Javier De Andres (PP) joango dira. Gaurko bileran gai horiek eztabaidatzeko lan-taldeak osatuko dituzte, Idoia Mendiak azaldu duenez.

Iruzur fiskalaz gain, hainbat gai jarriko ditu lehendakariak mahai gainean: Gizarte zerbitzuen iraunkortasunaz eta erakunde-sarearen eta ekipamendu publikoen eraginkortasunaz ere hitz egingo dute.

Idoia Mendiaren hitzetan, akordiorik lortzekotan "adostasun erraldoia" litzateke, lau erakundeen sinadurekin batera, "alderdi politiko guztien" onespena ere izango lukeelako.

Erakundeen arteko ezberdintasunak ere onartu ditu Mendiak, batez ere hainbat zerga berrezartzearen inguruan. Hala ere, hainbat gaitan bat etorriko direla esan du, tartean iruzur fiskalaren aurkako neurri berezietan.

Gaurko bileran "akordiorik" adostea ez du espero lehendakariak. "Bidea hastea" da bileraren helburu nagusia, datozen hilabeteetan neurriak adosteko xedearekin.

Goizeko 10:00etan hasiko dituzte bilerak. Jose Luis Bilbao izango da Lehendakaritzara heltzen lehena. Bilera bukatzean ez du adierazpenik egingo.

Ondoren Martin Garitanoren txanda izango da. 11:30ean bilduko dira, eta, ordubete geroago, hedabideen aurrean agertuko da Gipuzkoako ahaldun nagusia. Azkenik, Javier de Andres 13:00ean eseriko da Patxi Lopezekin. 14:00etan agerraldia egingo du.

17:30ean, Patxi Lopez lehendakariak bileren nondik norakoak azaltzeko agerraldi berezia egingo du, Lehendakaritzan.

Bestalde, Martin Garitano Gipuzkoako ahaldun nagusiari ETAren "gaitzespen" argia exijituko dio lehendakariak bileran, Mendiak jakinarazi duenez.