Ekonomia -
Greba mantentzen dute
Zuzendaritzaren proposamena errefusatu dute Metro Bilbaoko langileek
Horrela, ostegun honetan egindako batzarrek asteazkenero (05:45etik 07:45era) egiten ari diren lanuzteekin jarraitzea erabaki dute.
Erredakzioa
Goizean egin bezala, Metro Bilbaoko langileen arratsaldeko batzarrak zuzendaritzaren azken proposamena arbuiatu du. Ondorioz, lanuzteekin jarraitzea erabaki dute, LAB sindikatuko iturriek jakinarazi dutenez.
Greba-batzordeak batzarrak deitu zituen ostegunerako. Zuzendaritzaren azken proposamenaren berri eman diete langileei batzar horietan. Zuzendaritzak asteartean aurkeztutako proposamena, langileek ekainaren 30ean idatziz egindako aldarrikapenen erantzuna izan zen.Hain zuzen ere, geltokietako garraiatze eta ikuskapen arloko langile kopurua handitzea eskaini zen 166 eta 182 pertsonara, hurrenez hurren, Basaurira iritsi ahal izango delako etorkizunean.
Goizeko batzarreko partehartzaile guztiek, abstentzio bat kenduta, proposamena errefusatzea erabaki dute eta erabaki berdina aho batez berretsi dute arratsaldean.
Sindikatuetako iturriek azaldu dutenez, langile kopuruarekin ados daude, baina "osagai berriak" txertatzea arbuiatzen dute, izan ere, gidarien lan-baldintzei eragiten diete.
Ostegun honetan egindako batzarrek asteazkenero (05:45etik 07:45era) egiten ari diren lanuzteekin jarraitzea erabaki dute.
Greba-batzordearen aldarrikapen "guztiak" onartu dituztela esan du Metro Bilbaoko zuzendaritzak. Horregatik, batzarren erabakia ez duela ulertzen adierazi du zuzendaritzak. "Lanuzteak artifizialki luzatzea" deitoratu du enpresak, "gizartean duen eraginagatik".
