Navalek langileen erdiak kaleratuko ditu

Sestaoko ontziolaren jabetza duten enpresek gaur enpresa-batzordeari jakinarazi diotenez, 360 langileetatik 150 kaleratuko dituzte.

CCOO Euskadi sindikatuak agiri batean jakinarazi duenez, enpresaren erabakiak ustekabean harrapatu ditu, eta bilera bat deitu dute biharko, "erabaki horren ondorioak eta langileen egoera larria aztertzeko".

Joan den maiatzaren 2an Jan de Nul armadoreak eskatutako ontzirako xaflak mozten hasi ostean izan du sindikatuak albistearen berri.

Lana lortzeko zailtasun handiak igaro ostean, bazirudien Belgikako armadorearentzako ontziarekin "abiatu” egin behar zela enpresa, eta 2013ra arte lana ziurtatuta zutela.

Navaleko CCOO sindikatuak jakinarazi duenez, "erabaki horren aurka eta enpleguaren suntsiketaren aurka” dago.

Halaber, ELA sindikatuak lan-erregulazioko planaren erabakiaren aurkako mobilizazioak deitu dituzte eta "lurrarekin kutxa egiteko plan bakarra dauka" Construciones Navales del Norte enpresak.

"Merkatuaren egoerak Navaleko langileen kopurua murriztera" behartu du enpresaren bideragarritasuna ziurtatzeko, Construcciones Navales del Norte Navaleko jabeak jakinarazi duenez. "Lanak behera egin duela, finantzazio arazoak dituztela eta langileen kopurua desorekatua dagoela" adierazi dute; hori dela eta, langileen murrizketa beharrezkoa dela diote.

CNN enpresak 368 langile ditu egun, eta bideragarritasun planaren arabera, 212 langile baino ez dituzte behar.

Bestalde, Estatuko Industria Partaidetzarako Sozietatearen hitzetan, denbora behar dute lan-erregulazioko txostena aztertzeko eta pribatizazio akordioan jasotako lan bermeak betetzen diren egiaztatzeko.

2006ko abenduan pribatu bihurtu zuten Naval, Izar talde publikotik banatu ostean. Pribatizazio baldintzen artean, besteak beste, erretiroa arinago hartzeko eta enplegua berriro lortzeko bermeak ezarri zituzten Estatuko Industria Partaidetzarako Sozietatearekin lan-erregulazio txostena egitekotan.