Euskadik behar duen bat-egitea ez dela adierazi dute ELAk eta LABek

ELA sindikatuarentzat, BBK-k, Vitalek eta Kutxak egindako akordioa "ez da Euskadik beharrezkoa duen bat-egitea". ELA sindikatuaren esanetan, "bat-egite hori aurrezki kutxen eredu sozialetik oso urrun dago", izan ere, ELAk Nafarroako Kutxa (CAN) barne hartzen duen bat-egitearen alde dago.

Igor Eizagirre ELAko zerbitzuen saileko idazkari nagusiak komunikatu batean adierazi duenez, ELA "hiru kutxen osoko bat-egitearen alde egin du beti", Hego Euskal Herrirako kutxa baten aldarrikapena baztertu gabe.

Eizagirrek gogor kritikatu du atzo adostutako bat-egite hotza. Bere ustez, akordio hori "alderdi politikoek boterea banatzeko" duten interesen isla da. Eta horren bidez, "Euskadiko kutxak pribatizatzeko bidea zabaldu dute".

Bestalde, hiru aurrezki-kutxen bat-egitea "banketxe bihurtzeko" beste pauso bat dela adierazi du LAB sindikatuak. Horrela, "ekintza sozialerako ekarpena gero eta txikiagoa izango da", erantsi du LABek.

Sindikatuak komunikatu batean azaldu duenez, prozesuak aurrezki-kuxen "pribatizazioan sakontzen du", izan ere, finantza-negozioa "kontrol publikotik at geratzen da".

Operazioa "Espainiaren interesen eta beharrizanen" arabera antolatu dutela salatu du LABek, eta "atzean hiru alderdiren erabakiak daude". Sindikatuaren esanetan, bat-egitea bideratzeko ez dira irizpide teknikoak erabili.

Gaurko testuinguru ekonomiko eta sozialean "aurrezki-kutxak indartsuak izatea sekula baino beharrezkoagoa da Euskal Herrian euren funtzio soziala betetzeko", azaldu du LABek.