Ekonomia -
lan-erregulazioko espedientea
Productos Tubulares enpresako langileak, greba mugagabean ostegun honetatik aurrera
Tubos Reunidos filialak lanpostuak suntsitzeko lan-erregulazioko espedientea aurkeztu du. Enpresa batzordearen arabera, espedientea 'ez dago justifikatuta', eta 'kudeaketa txarra'ren ondorio da.
Agentziak
Productos Tubulares lantegiko enpresa batzordeak deituta, langileak greba mugagabean daude ostegun honetako 06:00etatik aurrera, Tubos Reunidos enpresaren filialak lanpostuak suntsitzeko enplegu-erregulazioko espedientea aurkeztu duela eta. Productos Tubulares enpresak Trapagaranen du egoitza, baina lantegia Sestaoko lurretan dago.
Enpresa batzordeko iturriek jakinarazi dutenez, greba deialdia "aho batez" onartu dute batzordean ordezkaritza duten sindikatu guztiek (CC.OO., UGT, ELA, LAB eta ESK), Enpresak lanpostuak suntsitzeko lan-erregulazioko espedientea aurkeztu zuela jakin eta gero.
Batzordeak 13 kide aukeratu ditu negoziazio mahaian jesartzeko. Enpresak deitu beharko du orain lehen negoziazio bilera.
Juan Beloki enpresa batzordeko presidenteak (ELA) azaldu duenez, "aurrekaririk gabeko erasoa" da lan-erregulazioko espedientea aurkeztea, ez baitago "justifikatuta".
Belokiren hitzetan, enpresaren "kudeaketa txarraren ondorio" da egoera, "maileguak eskatu eta eskatu" egon delako, "etekinak eurentzat gordez".
ELAk gogorarazi duenez, BBVA da Productos Tubularesen akziodun nagusia. Sindikatuaren esanetan, aurreko urteetan "milioiak" banatu dituzte akziodunen artean. Zehatz esateko, 2014-2016 urteen artean Zuzendaritza Batzordeak eta Enpresaren Administrazio Kontseiluak "ordainsaritan milioi bat euro baino gehiago partitu zituzten".
