Ekonomia -
Lan-gatazka
Siemens Gamesako zuzendaritzak bertan behera utzi du lan erregulazio txostena
Sindikatuek ere bertan behera utzi dituzte aurreikusitako lanuzteak eta greba. Aurretiazko erretiroa bezalako neurriak negoziatuko dituzte.
Agentziak | Erredakzioa
Siemens Gamesako zuzendaritzak bertan behera utzi du iragarritako lan-erregulazio txostena, sindikatuetako iturriek jakitera eman dutenez. Neurri horrek Siemens Gamesako 272 langileri eragin behar zien Estatu osoan.
Sindikatuek ere bertan behera utzi dituzte hurrengo asterako aurreikusitako lanuzteak eta abenduaren 15etik aurrera hasi behar zuen greba mugagabea.
Asteartetik aurrera, sindikatuak eta zuzendaritza langile kopurua murrizteko baldintzak negoziatzen hasiko dira eta, itxura guztien arabera, aurretiazko erretiroak, eszedentziak eta diruz lagundutako bajak jarriko dituzte mahai gainean.
Sindikatuak pozik agertu dira zuzendaritzaren erabakiarekin. "Pozik gaude. Borroka bat irabazi dugu, baina gerra ez. Hala ere, beste klima batean negoziatu ahal izango du, lan-erregulazio txosten baten mehatxurik gabe", adierazi dute sindikatuek. Zuzendaritzak 272 langile kaleratu nahi ditu Estatu espainiarrean, baina sindikatuek uste dute neurri ez traumatikoen bitartez (aurretiazko erretiroak, eszedentziak, diruz lagundutako bajak) zenbaki horietara iristea. "Hori da negoziatu behar duguna", gaineratu dute.
CCOO, ELA, LAB eta UGT sindikatuek sinatutako idatzia bidali diete langile guztiei, eta bertan lan-erregulazio txostena erretiratzea langile guztien "garaipen epikoa" dela azpimarratu dute.
