Aurrekontuen eztabaida abiatu dute, PP-EAJ akordioa ixtear dela

2017ko Estatuko Aurrekontu Orokorrek lehen izapidea gainditu behar dute. Espainiako Gobernuaren proiektuari aurkeztutako zazpi osoko zuzenketak eztabaidatu eta bozkatu behar dituzte gaur eta bihar Diputatuen Kongresuan. Ingurumari horretan, kontuak onartzeko behar duen babesaren bila, EAJrekin akordioa ixtekotan da PP. Rajoyren gobernuak bost boto behar ditu osoko zuzenketak baztertzeko, eta jeltzaleen babesa nahi du horretarako.

Bi aldeek martxoan abiatu zituzten negoziazioak, eta hainbat astez blokeatuta egon ostean, ostiralean adostasunerako bidea samurrago ikusi zituen jeltzaleek, eta osoko zuzenketarik ez aurkeztea erabaki zuten.

Andoni Ortuzarrek zuzentzen duen alderdiak akordioa lortzeko itxaropena du, baina ez du baztertu adostasuna zuzenketei buruzko eztabaida hasi ondoren erdiestea.

Ituna lortuta, Rajoyren gobernuak bost boto gehituko lizkioke bermatuta dituen 170ei —Ciudadanos, UPN, Foro eta Coalicion Canarias alderdietako diputatuen botoak eta PPkoenak—. Ganbera erdiaren babesa —175 boto— behar du Espainiako Gobernuak osoko zuzenketak atzera botatzeko.

Hurrengo izapideetarako, ordea, gehiengo osoa behar da, eta horretarako Nueva Canarias alderdiko ordezkariaren botoa ziurtatu nahian dabil PP.

Eztabaida eta bozketa

Osoko zuzenketen eztabaida eguerdian abiatu da Cristobal Montororen hitzaldiarekin. Ogasun ministroak aurrekontu proiektuaren lerro nagusiak azalduko ditu, eta, ondoren, saioa 16:00ak arte etengo dute.

Arratsaldean, aurkeztutako zuzenketak defendatuko dituzte taldeek. Denborarik emango ez balu, ostegunean jarraituko du eztabaidak. Agerraldi horiek amaituta, zuzenketa aurkeztu ez duten taldeen txanda izango da (Ciudadanosena eta EAJrena, kasurako).

Zuzenketa guztiak aldi berean bozkatuko dituzte.