PSEk 'Marguello kasua' Fiskaltzara bidaliko du

PSE-EEk Eusko Legebiltzarrean duen taldeak "Marguello kasu" ezagunean Herri Kontuen Euskal Epaitegiaren (HKEE) Osakidetzako zerbitzu kontratazioetako irregulartasunei buruzko txostena bidaliko dio Euskal Autonomia Erkidegoko Justizia Auzitegi Nagusiari (EAEAN). Horrela, PSEk nahasita dauden pertsonek erantzukizun penalik izan zuten jakitea espero du.

PSE alderdiko Blanca Roncal eta Miren Gallastegi parlamentariek jakinarazi dute erabakia HKEEk Gabriel Inclanen garaian Osakidetzak hainbat kontratu irregular egin zituela baieztatu duen txostena aurkeztu eta aste bat igaro ostean. Irregulartasun horiek, gainera, Gurutzetako Ospitaleko zuzendari ohia den Jose Carlos Marguellok parte hartzen zuen enpresekin nahasita daude.

Txostenak, beste hutsune batzuen artean, kontratuak "era zuzenean eta arrazoirik gabeko larrialdi prozedurak erabiliz" egin zirela adierazi du. Dokumentu hori gai hau aztertzen duen eusko Legebiltzarreko Ikerketa Komisiora bidali dute.

Roncalek azpimarratu du ikerketa honek Inclanen garaiko "Osasun Saileko irregulartasun kopuru nabarmena utzi du agerian" eta Inclanek berak Legebiltzarrean Marguelloren laguna zela onartu zuela gogoratu du. Parlamentariak Inclan irregulartasun horiekin nahasita dagoenik ez du esan nahi izan eta "lan hori" haren alderdiari ez dagokiola azaldu du.

EAJ

Bestalde, Herri Kontuen Euskal Epaitegiaren (HKEE) txostena PSE "propio gisa erabiltzen" ari dela salatu du EAJk.

PSEk txostena Fiskaltzari bidaltzea kritikatu dute Nerea Antia eta Eider Mendoza EAJko legebiltzarkideak komunikatu batean.

Laura Garrido (PP) kasua ikertzen duen Legebiltzarreko batzordearen presidenteak txostena aztertzeko bilera deitu behar zuen uztailean, baina ez du egin, "batzordeko beste kide batzuk aurkitzeko zailtasunak zituela argudiatuta".

Horregatik, Garridok "bere konpromisoa bete ez" duela salatu dute jeltzaleek, "batzordearen helburu propioen gainetik beste interes batzuen mesedetan" denborak eta deialdiak erabiliz.