2011n 2,37 milioi lanpostu finko gehiago izatea espero du Gobernuak

Uztailetik 2011ko amaierara arte 2,37 milioi kontratu mugagabe gehiago sortzea espero du Gobernu zentralak lan-erreformaren bidez, lege-dekretuaren memoria ekonomikoak azaltzen duenez. Dekretua bihar bozkatu behar dute Diputatuen Kongresuan.

Horrela, uztaila eta abendua artean 895.723 kontratu mugagabe sinatzea espero dute aurten. Bien bitartean, 2011n 1.474.497 kontratu gehiago izatea aurrikusten du Exekutiboak.

Txostenaren arabera, erreformako neurrien zenbait kostu zenbatu ditu Gobernuak, eta 2012ra arte 700 milioi euroko kostua izan dezakete.

Soldatak bermatzeko fondoa

Kontratu mugagabeen kaleratzeetan zortzi eguneko kalte-ordaina ordaindu beharko du soldatak bermatzeko fondoak (FOGASA). Hauxe izango litzateke partida nagusia, 123,6 milioi euroko kostua izango baitu.

Kontratu mugagabeak egitearren eman beharreko hobarietan, 2012ra arte 471,17 milioi euroko kostua aurrikusi du Exekutiboak.

16-30 urte bitarteko gazteei kontratu finkoak egitearen truke eman beharreko diru-laguntzetan 124,17 milioi euroko ( aurten 18,48 milioi, 59,13 milioi 2011n eta 46,56 milioi 2012an) inbertsioa izango dela uste du Gobernuak.

45 urtez gorako pertsonak kontratatzearen truke jaso beharreko hobarietan 212,88 milioi euroko gastua aurrikusi du Gobernuak (31,68 milioi aurten, 101,37 milioi 2011n eta 79,83 2012an).

Txandako lan-kontratuak mugagabeak bihurtzeko diru-laguntza 53,58 milioi eurotan zenbatu du Exekutiboak hiru urteetan.

Gainera, lanaldia murrizteko neurriak martxan jartzeko 115,76 milioi euroko gastua espero du Gobernuak.