Ekonomia -
Epaitegiak
Auzitegi Gorenak bertan behera utzi du kanon digitala
Auzitegiak ebatzi du PPk onartutako dekretua 'baliogabea' eta 'aplikaezina' dela, alegia, legez kanpokoa dela kopia pribatu bakoitzeko pagatu beharrekoa aurrekontu orokorren bidez finantzatzea.
AGENTZIAK | ERREDAKZIOA
Auzitegi Goreneko Administrazioarekiko auzietarako salak PPk onartutako kanon digitalari buruzko dekretua "baliogabea" eta "aplikaezina" dela ebatzi du, hots, obra baten egile bati kopia pribatu bakoitzeko pagatu beharreko kalte-ordaina Estatu espainiarreko Aurrekontu Orokorren bidez finantzatzea legez kanpokoa dela erabaki du.
El Español hedabideak gaur zabaldutako informazioaren arabera, Auzitegi Gorenak partzialki onartu du jabetza intelektualaren eskubideak kudeatzen dituzten hiru erakundek (Egeda, Dama eta Vegap) kanon digitala arautzen duen dekretuaren kontra jarritako helegitea.
Aipaturiko hiru erakundeen esanetan, kanon digitalari buruzko dekretua Europako legediaren kontrakoa da. Ildo horretan, obra baten egile bati kopia pribatu bakoitzeko pagatu beharreko kalte-ordaina erabiltzaile bakoitzak ordaindu beharko lukeela uste dute.
Gorenak bere osotasunean baliogabetu du araudia, baina ez ditu aztertu Jabetza Intelektualaren Legearen eta PSOEren Gobernuaren kanon digitalari buruzko 2011ko errege dekretuaren inguruko erreklamazioak. Epaiaren arabera, 2012ko errege dekretua "aplikaezina" da.
Europar Batasuneko Justizia Auzitegiak kanon digitala legez kanpokoa zela ebatzi zuen ekainean, egile eskubideei buruzko Europako direktiba baten aurkakoa zelako.