Ekonomia -
Lan-gatazka
Lanuzteekin jarraituko dute gaur Bizkaibusen
Txorierriko langileek ez dute onartu CCOOk eta UGTk adostutako aurre-akordioa, eta lanuztea egingo dute 07:00etatik 10:00etara eta 17:30etik 20:30era, Enkarterrin eta Durangaldean bezalaxe.
AGENTZIAK | ERREDAKZIOA
Txorierriko, Enkarterriko eta Durangaldeko Bizkaibusen zerbitzua eskaintzen duten langileek lanuzteekin jarraituko dute gaur enpresari lan-hitzarmen berria negozia dezala exijitzeko.
Bizkaibusentzat lan egiten duen GAM Txorierri enpresako beharginek errefusatu egin zuten atzo zuzendaritzak eta CCOO eta UGT sindikatuek lortutako aurre-akordioa. 86 langilek itunaren kontra bozkatu zuten; 49k, alde; eta bederatzi abstenitu egin ziren.
Hori dela eta, hasiera batean iragarritako lanuzteekin jarraituko dute datozen egunetan. Asteazken honetan, adibidez, 07:00etatik 10:00etara eta 17:00etatik 20:00etara egingo dituzte lanuzteak.
Sindikatuetako iturriek jakinarazi dutenez, 2014an zuzendaritzarekin lortutako akordioa oinarri izango duen lan-hitzarmena negoziatzea da helburua.
Ostegunean ere hiru orduko lanuzteak izango dira, goizean (07:00-10:00) eta arratsaldean (17:00-20:00).
Bestalde, lau orduko geldialdiak egingo dituzte, goizetan (07:00-11:00) eta arratsaldetan (17:00-21:00), ondoko egunetan: maiatzaren 30ean eta 31n eta ekainaren 1ean, 2an, 3an, 6an, 7an, 8an, 9an eta 10ean.
