Cebek: 'Gobernu sendo bat izan ezean, inbertsioak geldituko dira'

Bizkaiko Enpresarien Konfederazioa (Cebek) kezkatuta agertu da urtebete igaro daitekeelako Espainian "gobernu sendo bat" izan gabe, eta horrek enpresa handien inbertsioak gelditzea ekarriko duela ohartarazi du.

Cebeken urteko batzarraren bezperan, Iñaki Garcinuño presidentea eta Francisco Javier Azpiazu idazkari nagusiak agerraldia egin dute Bizkaiko egoera ekonomikoa azaltzeko.

Patronalaren iritzian, 2016a urte ona izango da Bizkaia. Ekonomiaren gorakada % 2,5ekoa izango dela aurreikusi dute, iaz baino apur bat gutxiago (% 2,8). Enpleguari dagokionez, 8.000 lanpostu inguru sortuko direla espero dute. Industria sektorean, urteko lehen hiruhilekoan, jada 1.000 lanpostu sortu direla jakinarazi dute.

Hazkuntza “garrantzitsua” dela azpimarratu dute eta, ondorioz, “komunikabideetan irakur daitezkeen diskurtso katastrofistak” ekiditeko eskatu dute. Nolanahi ere, patronalak aitortu du kezkatuta dagoela Espainian gobernurik osatu ez delako eta egoera hori luzatzeko arriskua dagoelako.

Lan-egutegiari, kritikak

Bestalde, Cebekek 2017ko lan-egutegia kritikatu du, normalean baino “zubi” gehiago izango dituelako. “Horrek ez du ekonomia suspertzen lagunduko; lauzpabost egunetako geldialdiek enpresetako jarduera eteten dute”, erantsi du.

“Dagoeneko mahai gainean jartzen ari diren” lan-egutegiak “jarduera ekonomikoari laguntzen” ez diola ohartarazi du Garcinuñok.

Gaia “segur aski” EAEren “eskumenetatik at” dagoela onartu du enpresaburuak, baina “lanaldiekin batu” beharko litzatekeela erantsi du.

“Lan-egutegia lanaldiarekin batu eta galdutako lan-egunak murrizteko neurriak hartzea ezinbestekoa da”, gaineratu du.