Confebask: "Lan araudiak oso berrikusketa sakona behar du"

Jose Guillermo Zubia Confebask euskal patronalaren idazkari nagusiak uste du "lan araudiak oso berrikusketa sakona behar" duela, izan ere, "enplegu eta ekonomia jarduera mantsotzen" duela uste du.

ETBri eskainitako elkarrizketa batean patronalaren buruak azaldu duenez, Langileen Estatutua frankismoko Lan Foruaren "jarraipena" besterik ez da eta egungo ekonomiaren eta gizartearen egoera "erabat" desberdina da garai hartakoarekin eta 80ko hamarkadarekin alderatuta.

Haren esanetan, ekonomiak "inoiz behar izan ez duen malgutasuna behar du" eta lan-sistemaren erreformak babes mekanismoei ere eragin behar die, Europar Batasunakoekin "bateragarriagoak" bilakatzeko.

Zubiak agerian utzi du ekonomiaren susperraldiak "zalantzak" agertzen dituela, baina "aurreikuspenak gorako joera" erakusten duela.

Ohartarazi duenez, "ekonomia hazi gabe ezin da enplegurik egon eta hazkundea oso txikia izaten ari da", izan ere, "hipotesi onenek % 0,2-0,3ko hazkundea iragarri dute" EAErako.

Lehendakariaren aholkulari batzordea

Patxi Lopez Lehendakariari gai ekonomikoetan laguntza emango dion aholkularitza taldeari buruz, lehendakariak aholkuak jasotzeko eskubidea baino "obligazioa" duela adierazi du.