Ekonomia -
Iberdrolaren emaitzak
Iberdrolak 953 milioi euroko irabaziak izan ditu martxora arte
Konpainia elektrikoak hiru arrazoi eman ditu emaitza horiek arrazoitzeko: nazioarteko salerosketak, EDPn zeukan parte-hartzearen salmenta eta Brasilen zituen aktiboak saltzea.
Erredakzioa
Iberdrolak 953 milioi euroko mozki garbia izan du 2014ko lehen hiruhilekoan, 2013ko epe berean baino % 8,4 gehiago, Iberdrola enpresak asteazken honetan jakinarazi duenez. Dena den, irabazi garbi errepikaria (ohiz kanpokoak gabe) % 4,6 jaitsi da, eta 848 milioi eurokoa izan da.
Konpainia elektrikoak azaldu duenez, "emaitza hauek negozio guztiak martxa onean daudela adierazten dute". Hala ere, Espainian aplikatutako neurriek eragin "negatiboa" izan dutela nabarmen du Iberdrolak, hain zuzen ere, 260 milioi eurokoa. 2014an neurri horien eragina 380 milioi eurokoa izango dela aurreikusten du enpresak.
Ignacio Sanchez Galanek zuzentzen duen konpainiak hiru arrazoi eman ditu emaitza horiek azaltzeko: nazioarteko salerosketetan izandako arrakasta, Iberdrolak EDPn zeukan parte-hartzearen salmenta, eta Brasilen zituen aktiboak saltzea.
Otsailean EDPn zeukan parte-hartzearen % 3,7 saldu zuela iragarri zuen Iberdrolak, eta orain enpresa portugaldarren % 2,9 kontrolatzen du. Halaber, Brasilgo Itapebi enpresan zeukan parte-hartzearen % 22,6a saldu zuen.
