IATen enpresa batzordea eta kontzesionarioa, akordiorik gabe

Ibilgailuen Azterketa Teknikoa (IAT) egiteko Urnietako eta Irungo (Gipuzkoa) zentroen enpresa batzordearen eta TUV Rheinland Ibérica S.A. kontzesionarioko ordezkarien arteko bilera akordiorik gabe amaitu da, asteazken honetan. Bilera Donostiako egoitzan egin dute. Astelehen eguerdian beste bilera bat egingo dute, enpresa eta sindikatuek akordio bat lortzeko asmoz, bederatzi hilabeteko grebari amaiera jartzeko.

TUV Rheinland Ibérica S.A. konpainiak ohar bat bidali du, "batzordearen ezetzaren aurrean" bilera akordiorik gabe amaitu dela esanez, enpresak egindako "proposamena errefusatu baitu", "2015. eta 2016. urteetako soldatak igotzeko tarifak igotzeko baldintza" kendu arren, "akordio bat lortzeko asmoz".

"Egoera hau bederatzi hilabeteko gatazkaren ostean eman da, enpresak soldatak doitzearen, kaleratzeen, lan-erregulazioko txostenen, lanaldiak igotzearen, ordutegiak aldatzearen edota beste edozein aldaketaren inguruan neurri bat bera ere hartu gabe", nabarmendu du.

Bestalde, Ketxus San Emeterio enpresa-batzordeko presidenteak akordiorik gabe amaitu izanaren erantzukizuna TUV Rheinland Ibérica S.A. konpainiarena dela esan du, oporrei eta langile berrien soldatei buruz aurretik adostutako akordioaren "hainbat puntu" aldatu dituelako, horren arabera. Halaber, "gatazka luzatzen jarraitzea" eta "akordioa lortzeko nahia ez izatea" leporatu dio enpresari.