Euskalteleko azpikontratek baldintza duinak agindu dizkiote Kutxabanki

Azpikontraten bidez Euskaltelen lan egiten duten langileek, elkarretaratzea egin dute gaur Kutxabankek Bilbon duen egoitzaren aurrean. Lan kostuen murrizketan oinarritzen den aurrezki plana jarri du martxan Euskaltelek, eta plan horrek "azpikontratatutako langileen baldintzetan eragin zuzena" duela salatzeko protesta egin dute beharginek, ELAk jakinarazi duenez.

Esan bezala, "lan baldintzak eta lanpostuak arriskuan daudela" salatu dute langileek, eta Euskaltelen 600 pertsona inguru azpikontratatuta daudela ekarri dute gogora.

ELAk esan duenez, "Euskaltelek Zamudion eta Donostian dituen egoitzetan, enpresa jaio zenetik daude hainbat langile azpikontratatuta, eta urteekin kopuru hori nabarmen hazi da". "Hori dela eta, azpikontratatutako enpresak dira batez ere, sareen mantenuaz, bezeroekin telefonoz aritzeaz edota etxeetan zerbitzua instalatzeaz arduratzen direnak. Gainera, geroz eta autonomo eta aldi baterako enpresa gehiagok egiten dituzte antzeko lanak Euskaltelentzat", azaldu du.

Salatu dutenaren arabera, "kasu askotan azpikontratatutako langileen baldintzak ez dira duinak, besteak beste, subrogazioa kontutan hartzen ez duten hitzarmenak dituztelako".

Bukatzeko, argi utzi dute "azpikontratek egindako zerbitzuetara zuzendutako aurrekontuak murriztu" dituela, azken hilabeteetan, Euskaltelek. "Aurreikusitakoaren arabera, 2014rako aurrekontua %20 murriztuko dute, eta azpikontratei orain arte eskainitako zerbitzu eta kalitate bera exijituko zaie", azpimarratu dute.