Fagorren egoerak ez die euskal enpresei eragingo, SPRIren ustez

Alexander Arriola SPRIko (Eusko Jaurlaritzako Enpresa Garapenerako Euskal Agentzia) zuzendariaren iritziz, hartzekodunen konkurtsoan sartuko den Fagor Etxetresnaken egoerak ez die Mondragon Korporazio Kooperatiboko enpresei eragingo, ezta gainerako euskal enpresei ere.

Euskadi Irratian egindako elkarrizketan adierazi duenez, beste hainbat enpresak bezala, bere garaian Fagorrek argi izan zuen nazioartera zabaldu beharra zeukala. "Ezin dugu esan erabaki hori zuzena izan ez zenik, baina beharrezkoa litzateke oker egin diren gauzak aztertzea", esan du.

Modu horretan, Fagor Etxetresnaken erabakiak enpresan bertan eta Mondragon Korporazioan izango dituen ondorioak ez direla berdinak izango azpimarratu du. Horren ustez, hartzekodunen konkurtsoan sartzeak "kooperatiban bertan izango ditu ondorioak, baina Korporazioan ez du zertan eraginik izan, azken hauek urteak daramatzatelako lanean, eta merkatuek zein bezeroek oso ondo ezagutzen dutelako produktuaren kalitatea".

"Beraz, Mondragon Korporazio Kooperatiboari ez dio eragingo. Urte askotako lana dago honen guztiaren atzean, eta bezeroekin harreman zuzena dute", gaineratu du.

Bestalde, Pedro Esnaola Gipuzkoako Merkataritza Ganberako presidenteak "lasaitasunez" jokatu behar dela nabarmendu du. Horretarako beharrezkotzat jo du, Fagor Etxetresnakek une honetan egin dezakeen lana zein den zehaztea, horren arabera erabaki bat edo beste hartzeko.

Ildo horretan, argi utzi du Euskadiko eredu ekonomikoa ezin dela zalantzan jarri, eta industria "berrikuntzaren" bidetik bideratzeko deia egin du.

Esnaola Radio Euskadin izan da gaur, Fagor Etxetresnaken egoerari buruz hizketan.