Ekonomia -
Lan-gatazka
Adegi: 'Gipuzkoako zahar-etxeen gatazkan akordioa ezinezkoa da'
Horrenbestez, Lan Harremanen Kontseiluari bitartekari lanak egiteko eskatu dio, eta Gipuzkoako Diputazioa kritikatu du "sindikatuen plataforma bere egin duelako".
Erredakzioa
Gipuzkoako zahar-etxeen lan-gatazkan bitartekari izateko eskatu dio Adegik Lan Harremanen Kontseiluari, akordio ekonomiko batera heltzea "ezinezkoa" izango dela iritzita.
Jesus Gomez Montoya Gipuzkoako Gerontologia Zentroen Elkarteko presidenteak Gipuzkoako Diputazioaren jarrera ere gogor kritikatu du, "sindikatuen plataforma bere egin duelako".
"Negoziazioa egoera anomaloan dago, zortzi urtetan gauzak funtzionatu badute ere", nabarmendu du. Era berean, gogora ekarri du adinekoentzako egoitzak "gizartearen motor garrantzitsua" direla, "beste produkzio sektore bat" dela.
Horrez gain, Gipuzkoako Diputazioak "zer sinatu behar den esateko" ahalmenik ez duela esan du. "Guk negoziatzeko prest gaude, baina sindikatuekin, ez Diputazioarekin".
"Diputazioa ez da arazoaren parteetako bat, Diputazioa, Lan Harremanen Kontseilua bezala, bitartekaria izan daiteke, baina ez besterik".
Aldundiaren aurkako salaketa
Adegik Gipuzkoako Foru Aldundiaren aurka aurkeztutako helegitearen harira, salaketa ez dutela erretiratuko jakinarazi du, "Diputazioak bere proposamena sinatzera behartzeari uko egin ezean".
Bitartean, lan-hitzarmenetan zehaztutako baldintzak betetzen jarraituko dutela iragarri dute. "Diputazioak bere konpromisoei eusten badie, guk ez daukagu arazorik baldintzak malgutzeko", esan du Adegik.
