Patxi Lopezekin bildu da Urkullu, Aurrekontuetan onartzeko babes bila

Iñigo Urkullu lehendakaria Patxi Lopez PSE-EEko buruarekin bildu da astelehen honetan, 2013ko Aurrekontuen inguruan akordio bat ixteko gainerako alderdiekin lehendakariak ireki duen bilera sortaren baitan.

Lehendakaritzatik ez du baieztatu bilera egin duten ala ez, eta iturri sozialistek ez dute ez baieztatu ezta ukatu ere. Hala ere, bilera egin izana baieztatu diote hitzorduaren nondik norakoak ezagutzen dituzten gertuko iturriek EFE agentziari.

Gaur bertan, 2013ko Aurrekontuen inguruan akordio bat ixteko helburuarekin,  EAEko alderdi politikoei ''gutxieneko batzuk'' aurkeztuko dizkiela aurreratu du Iñigo Urkullu lehendakariak. Dokumentu horretan "marra gorri" batzuk ezarri ditu Urkulluk, Jaurlaritzak "daukana baino gehiago" gastatu ez dezan.

"Oinarri horren gainean aurrekontua azken minutura arte negoziatuko dugu", esan du lehendakariak Copreci kooperatiban egindako ekitaldian (enpresa horrek bere 50. urteurrena ospatuko du aurten) . "Bizi dugun egoerak Aurrekontu berri bat behar du, baita erantzukizuna eta kontrola ere bai", gaineratu du. "Hau da Euskadik behar duen Aurrekontua".

Aurrekontuen inguruan akordio bat lortzeko "ahal den guztia" egingo duela nabarmendu du Urkulluk. Horren iritziz, "herriak akordioak eta ardura partekatua behar ditu  aurrera egin nahi badu". "Ahal den guztia egingo dugu Aurrekontuak  onartzeko", gaineratu du.

PSE-EE

Bestalde, Idoia Mendia PSE-EEko bozeramaileak goizean esan du Aurrekontuen inguruan hitzarmena lortzeko "tartea" badagoela, Urkullu lehendakariak diru-bilketaren aurreikuspenak aldatzeko borondatea erakusten baldin badu.

ETBri eskainitako elkarrizketan, Mendiak adierazi du PSE-EEren jarrera "oso argia" izan dela.