Bizkaian bildutako diru-kopurua % 0,7 jaitsi da 2012an

Itundutako zergen bidez 6.011,4 milioi euro bildu dira 2012ko abendurako; aurreko urtean, ordea, 6.053,2 milioi euro bildu ziren aldi horretan. Guztira, beraz, % 0,7 gutxiago bildu da 2012ko abendura arte, iazko aldi berarekin alderatuta.

Kopuru horrek urrian Finantza Publikoen Euskal Kontseiluan egin zen aurreikuspenarekin "bat egiten" duela ekarri du gogora Aldundiak. Hala ere, urte osorako aurreikuspenen arabera, 6.368,5 milioi euro biltzea espero zen, beraz, zerga-sarreren aurrekontuaren % 94,4 bete da Bizkaian.

Zuzeneko zergen bilketa % 0,6 jaitsi da: 3.121,4 milioi euro bildu dira 2012an, eta 3.103,4 milioi bildu ziren 2011n.

PFEZak % 1eko igoera izan du; sozietateen gaineko zergak, ordea, % 3,1 egin du behera. Ondarearen gaineko Zergaren bidez, guztira, 61,8 milioi euro bildu dira 2012ko abenduaren amaierara arte.

Zeharkako zergen bilketan % 3,4ko jaitsiera egon da: 2.329,4 milioi euro bildu dira 2012an; aurreko urtean, berriz, 2.411,7 milioi euro.

Zerga berezietan, hidrokarburoen gainekoak % 3,2 egin du behera; elektrizitatearen gainekoak, % 3 gora; alkoholaren eta edari eratorrien gainekoak, % 12,5 behera, eta tabakoaren gainekoak, % 16,4 gora.

Aldundiak berak kudeatzen dituen zerga itunduetan, 5.515,4 milioi euro bildu dira 2012ko abendura arte; % 1,2ko jaitsiera egon da.