Rajoyk Kutxabanken kontrola bermatu nahi die euskal kutxei

Aurrezki kutxa guztiekiko jarrera berdina izango ez dela ziurtatu du asteazken honetan Mariano Rajoyk. Presidentearen hitzetan, kutxa batzuek ''gauzak ongi egin dituzte'', eta beste batzuek berriz, ''gaizki''; eta, beraz, ez dituzte batzuek eta besteak berdin tratatuko. Hori horrela, Espainiako presidenteak Kutxabanken kontrola euskal kutxei bermatu nahi die, eta hori lortzeko helburuarekin, Europar Batasunarekin negoziatzen ari da.

Hala erantzun dio presidenteak EAJri, jeltzaleek Kongresuan egindako galdera baten aurrean. Aitor Estebanek hartu du hitza, eta euskal kutxak bezala ondo kudeatu diren erakundeei besteei ezarriko zaizkien baldintza berak inposatzea ''bidegabekeria'' litzatekeela defendatu du.

Rajoyk arrazoia eman dio jeltzaleari, eta EAJrekin gaia jorratzeko konpromisoa hartu du. Halaber, kudeaketa egokia izan duten kutxek beren bankuen kontrola izaten jarraitu ahal izan dezaten Europarekin negoziatzen jarraituko duela ziurtatu du Rajoyk.