EAEko langabe kopurua % 0,22 jaitsi da uztailean

371 langabe gutxiago zenbatu dira EAEn uztailean, hau da, % 0,22 egin du behera tasak, eta 167.393 langabe daude guztira gaur egun, Lan Ministerioak zabaldutako datuen arabera.

Iazko uztailarekin alderatuta, 4.200 pertsona gutxiago daude langabezian, % 2,45 gutxiago, alegia.

Espainian, oro har, 29.841 langabe gutxiago zenbatu dira aurreko hilabetean, eta 4.419.860 dira guztira. Beraz, kopurua legealdia hasi zenean zegoen kopurua (4.422.359) baino txikiagoa da lehenengoz: 2.499 langabe gutxiago dira.

Lurraldekako datuak

Lurraldeka, Bizkaian jaitsi egin da langabezia (497 pertsona; -% 0,53), baina hazi egin da Araban (72 pertsona; % 0,26) eta Gipuzkoan (54 pertsona; % 0,12).

Sektoreei erreparatuta, jaitsiera handiena eraikuntzan izan da (576 langabe gutxiago), eta ondoren industrian (318) eta nekazaritzan (27).

Zerbitzuetan, berriz, gora egin du langabeziak (62 pertsona gehiago lan gabe).

Kontratu motei dagokienez, 68.558 aldi baterakoak izan dira, eta mugagabeak, aldiz, 4.242.

Nafarroa

Foru Erkidegoan, langabezia % 0,76 jaitsi da aurreko hilabetearekin alderatuta, hau da, 360 pertsona gehiagok dute lana.

Iazko hilabete bereko datuekin alderatuta, langabezia % 8,30 murriztu da.

Guztira, 46.747 pertsona daude langabezian Nafarroan.