Krisi Ekonomikoa -
2013ko aurreikuspenak
Atzeraldia arinduko den arren, langabezia haziko da, BBVAren arabera
Azken aurreikuspenak hobetu ditu, eta atzeraldia aurten % 1,1ekoa izango dela uste du. Hala ere, langabezia tasa % 26,8raino iritsiko omen da.
Erredakzioa
BBVAk hobetu egin ditu Espainiaren aurreikuspen ekonomikoak eta 2013an atzeraldia Barne Produktu Gordinaren % 1,1ekoa izango dela esan du. Hala ere, enpleguaren aurreikuspena aurreko txostenean baino okerragoa da, eta langabezia % 26,8raino iritsiko dela uste du BBVA banketxeak.
Francisco Gonzalez buru duen banketxearen ikerketa zerbitzuak Espainiaren egoera ekonomikoari buruzko azken txostena aurkeztu du. Txosten horren arabera, Espainiako ekonomiak hondoa joko du aurten eta 2014an hobetu egingo dela pentsatzeko arrazoiak daude.
Hori horrela, Espainiako Gobernuaren aurreikuspenetik gertu geratu da BBVA, nahiz eta Rajoyren Gobernuak atzeraldia aurten % 0,5ekoa izango dela aurreikusi.
BBVAk azaldu duenez, finantziazio merkatuen irekiera eta finantza merkatuen lasaitasunak eragin omen du aurreikuspenen hobekuntza.
