Fagor Etxetresnak urte hasieran hasiko da garbigailuak ekoizten

Fagor Etxetresnak enpresa, orain CNA taldearen parte dena, garbigailuak ekoizten hasiko da 2015eko lehen hiruhilekoan Arrasateko Garagartza lantegian, eta datorren urteari begira 160 milioi euroko fakturazioa izatea aurreikusten du zuzendaritzak.

CNA taldeko arduradun nagusiak, tartean Jorge Palade presidentea zela, eta Arantza Tapia Eusko Jaurlaritzako Ekonomia Garapen eta Lehiakortasunerako sailburua Fagor Etxetresnaken Garagartzako lantegian izan dira gaur, eta elkarrekin prentsaurrekoa eskaini dute. Garagartzan labeen eta sukaldeko plaken ekoizpena hasia da dagoeneko eta laster hasiko dira garbigailuak egiten.

Ekoizpena hasita, dagoeneko hasi dira Fagor eta Edesa markako etxetresnak Espainian saltzen eta laster hasiko dira nazioartean ere saltzen. Gaur egun, 200 labe eta 300 sukalde plaka egiten dituzte egunero Garagartzan, baina martxorako ekoizpena bikoiztea aurreikusten dute enpresako agintariek.

Hala ere, oraindik argitzeke dago Basauriko Edesa lantegiarekin zer gertatuko den; izan ere, Francisco Martin Fagor CNA taldeko zuzendari nagusiak azaldu duenez, sakoneko azterketa egiten ari dira Basauriko lantegia berriz martxan jartzeak edota ekoizpena Gipuzkoako beste lantegi batzuetara eramateak duen kostea kalkulatzeko.

Ikerketa horien ondorioak datorren asterako prest izatea espero dutela iragarri du Martinek, eta dena dela termoen ekoizpena "partzialki gutxienez" berriz martxan jarriko dela nabarmendu du, izan Basaurin edo Gipuzkoan.