Gizartea -
Emakumeen aurkako indarkeria
Emakume bat atxilotu dute Gasteizen emakumeak prostituziora behartzea leporatuta
Mehatxupean eta oso baldintza larri eta abusuzkoetan zituen emakumeak etxebizitza batean. Beste emakume bat ere ikertzen ari dira gertakari beragatik.
eitb media
Ertzaintzak emakume bat atxilotu du Gasteizen etxebizitza batean emakume batzuk mehatxupean prostituziora behartzea leporatuta. Beste emakume bat ere ikertzen ari dira gertakari beragatik.
Eusko Jaurlaritzaren Segurtasun Sailak jakitera eman duenez, joan den hilaren amaieran, Ertzaintzak jakin zuen Gasteizko etxebizitza batean hainbat emakume bizi eta prostituzioan aritzen zirela, antza denez, jardueraren arduradunak mehatxatuta eta baldintza larri eta abusuzkoetan.
Ertzaintzak uste du emakumeak biktimek paperik ez zutela baliatzen zuela sexu-zerbitzuetara behartzeko eta lortzen zuten dirua modu bidegabean eskuratzeko.
Biktimek ez zuten etxean sartu eta irteteko giltzarik, eta, bideo zaintza sistema baten begiradapean zeuden, bizitzeko baldintza eskasetan.
Gizakien Salerosketako (sexu-esplotaziorako) taldeko ertzainek egindako ikerketa medio, ostegunean 45 urteko emakume bat atxilotu zuten prostituzio hertsagarriagatiko ustezko delitu bat egotzita. Beste emakume bati ere eginbideak ireki zaizkio, delitu berean ustez parte hartzeagatik.
Atxilotua, polizia-izapideak amaitu ondoren, epaitegian aurkeztu dute.