Prestaketa

Txangurru donostiar erara

Zartagin batean gurinarekin azenarioa eta tipulina zati txikitan moztuta erregosten jarriko ditugu. Eginda daudenean, itsaki krema eta tomate saltsa bota. Irakiten hasten denean, koñak txorrotada bota eta garreztatu. Txangurru izpitua sartu, irakin bat eman eta geroko gorde.

Bakailao kokotxa brandada

Bakailao kokotxak baratxuri oliotan epeldu egingo ditugu egin arte. Oliotatik atera, ontzi batean sartu eta bertara patata egosi zati batzuk sartu, esne txorrotada txiki bat eta sardexka batekin osagaiak zanpatzen joango gara. Baratxuri olioa pixkanaka botatzen joango gara, hari bat bezala, ondo emultsionatu arte.

Tipulin eta tomate erreak

Tipulina zuritu eta lau zatitan moztu. Tomateak zuritu, erditik ebaki eta haziak kendu. Labe erretilu batean jarriko ditugu, olioa eta gatza bota eta labera sartu, 180 ºC-tan 30 minutuz.

Pikillo piper emultsioa

Pikillo piperrak zartagin batean olioarekin konfitatuko ditugu. Ondoren osagai guztiak ontzi batean sartu eta birringailuarekin emultsio bat sortuko dugu.

Entsalada:

Uraza hostoak uretan garbitu, xukatu eta beste osagaiekin gozatu.

Bukaera

Uztai batean tipulina eta tomate erreak sartuko ditugu. Gainean txangurrua donostiar erara jarri, brandada koilarakada bat ere bai eta ondoan urazak. Pikillo emultsioarekin platerean hari batzuk egin.