"Nire euskara maila hobetzera nator "Baserria" saiora"

Duela hiru urte etorri zen Errusiatik Euskal Herrira, bere mutila bertakoa baita, eta euskal kulturarekin maitemindu zen. Euskara ikasten hasi zen eta gaur egun, B2 maila dauka. Hobetzen jarraitu nahi du.

Svetlanak dakizkien bost hizkuntzetako bat da euskara. Errusiera, gaztelania eta ingelesa ere hitz egiten ditu eta txinera ikasten aritu zen. Itzultzailea da izatez, nahiz eta gaur egun idazkari lanetan ari den.

Izaeraz, emakume goxoa, alaia eta hiztuna da. Jendea ezagutzea gustatzen zaio eta beti dago laguntzeko prest. "Nik laguntza beharko banu ez nuke lotsarik izango eskatzean eta nirekin berdina egitea gustatuko litzaidake".

Eztabaidak, ordea, ez ditu batere gustuko. Aurreko edizioko Axun du erreferente: "bera bezala, ez nintzateke sartuko eta lasai egotea gustatuko litzaidake". Hala ere, zerbait gustuko ez badu, esan egingo du. Izan ere, bere ustez, "derrigor hitz egin behar da momentuan momentukoa, ondoren arazo handiagoak ez izateko".

Egin beharreko probei dagokionez, bere ustetan, talde lanik ez badago, lehiaketa onik ez dago. Kasu batzuetan, gainera, lidergoa hartzeko prest egongo litzateke. "Beti ere egoera kontrolatzen badut", dio.