Txirri, Mirri eta Txiribitonen gaineko dokumentala, urte berriari ongietorria egiteko ETB1en

2024ko abenduaren 22an, 40 urte bete dira Xabier Otaegi, Juan Ignacio Piter Ansorena eta Txema Vitoriaren "Don don kikilikon" saioaren lehen atala emititu zenetik. Txirri, Mirri eta Txiribitonek telebistara salto egiteak betiko aldatu zuen haur euskaldunen aisialdia. Euskal Herriko sinbolo bihurtu dira eta, haien ibilbidea omentzeko helburuz, Txirri, Mirri eta Txiribiton. Mende erdia Euskal Herria alaitzen dokumentala estreinatuko du ETB1ek asteazken honetan.

Lanak pailazoen ibilbide osoa kontatuko du, haien bidelagun eta jarraitzaileei egindako elkarrizketekin. Ez dira faltako artxiboko irudiak ezta haien ibilbide osoan hain presente egon diren abestiak ere, herriarenak bihurtu diren kantu horiek ere omendu nahi baititu lanak. Horretarako, hiru bideoklip ikusiko ditugu: Gure Zirkuko artistek Paristik natorren abestu dute; Euskal Telebistako hainbat aurpegi ezagunek, Altza Pelipe; eta Donostiako Udaleko Abesbatza Txikiak, Pintto, Pintto.

Duela 50 urte baino gehiagotik ari dira Txirri, Mirri eta Txiribiton belaunaldi guztiak hunkitzen. Izan ere, 1972an hasi ziren ikuskizunak egiten; Kixki, Mixki eta Kaxkamelon ziren garai haietan. Ehunka telebista ordu egin dituzte, Euskal Herri osoko oholtzetara igo dira, hogei disko baino gehiago eta hamaika liburu argitaratu dituzte… Don Don Kikilikon, Funtzioa, Xagusarroski kondea, Patxistein doktorea, Pantera Beltza, Barre Busa, TrikiTraka TrikTron… izugarrizko balioa duen ondarea utzi dute. Horri guztiari egingo dio omenaldia dokumentalak, urtarrilaren 1ean, ETB1en, 21:45ean.

Ondoren, eta omenaldiekin jarraituz, ''Beti Oskorri'' emanaldi bereziaren bilduma izango dugu ikusgai, Oskorri taldearen abestiak gogora ekarriko dituen ikuskizun berezia.