Prentsa aretoa
ESTREINALDIA
"ZETAK: Hau ez da kontzertu bat" dokumentala estreinatuko du ETB1ek asteazkenean
EITB MEDIA
Urtarrilerako, Nafarroa Arenan egingo den Mitoaroa izeneko ikuskizun berezia ari da prestatzen Zetak taldea. Emankizun horren aurretik kontzertu sekretua egin zuten Unanun, "AAZTIYEN" diskoa egiteko inspirazio iturri izan den Sakana eskualdeko herri txikian.
ZETAK: Hau ez da kontzertu bat dokumentalaren estreinaldia izango dugu asteazken honetan, 23:05ean, ETB1en eta eitb.eus-en, Pello Reparaz eta bere taldea inoiz ez bezala ezagutzeko aukera emango digun ikus-entzunezko lana. Unanun, AAZTIYEN azken lanaren inspirazio iturri izan den Sakana bailarako herri txikian, Zetak taldeak joan den irailean emandako kontzertuaren nondik norakoen berri emango du. Horretarako, abeslariak bere intimitatearen ateak ireki, eta alde pertsonal zein profesionalean izan dituen hainbat gorabehera kontatuko ditu. Haren lankideez gain, familia eta lagunak ere ezagutuko ditugu.
Unanuko tradizio, kultura, mito eta pertsonaietan oinarrituta sortu ditu Zetak taldeak AAZTIYEN diskoko abestien letra, doinu eta iruditeria, mamoxarroen eta muttuen janzkeran eta historian oinarrituta, batik bat. Unanuko herriak Pellori eta Zetak taldeari emandako guztiagatik, esker ona adierazi nahi izan zieten erdi sekretupean antolatutako kontzertua eginda. Horrekin batera, mugarri bat ezarri nahi izan zuten urtarrilean Nafarroa Arenan aurkeztuko duten Mitoaroa ikuskizunari begira.
80 biztanle inguru dituen herri txiki horretan mila pertsona baino gehiago bildu ziren Zetak taldearen emanaldiaz gozatzeko. Unanutarrek egun osoko egitaraua prestatu zuten, gainera: herri kirolak, herri bazkaria, kalejira… Hori guztia, kontzertuaren prestaketa lanak eta momentu ikusgarrienak bilduko ditu, Pello Reparaz protagonista hartuta, asteazken gauean ETB1en eta eitb.eus-en ikusgai izango dugun dokumentalak. Astebete geroago, abenduaren 4an, iritsiko da ikus-entzunezko lana Primeran plataformara.
ZETAK: Hau ez da kontzertu bat dokumentalaz hitz egiteko, asteazkenean bertan, ETB1eko Biba Zuek! eta 11 Entzuteko saioetan izango da Pello Reparaz.
