ETBk inoizko jarraipenik handiena egingo du Behobia-Donostia lasterketa jendetsua zuzenean eskaintzeko

27.000 lagun baino gehiagoren parte hartzea izango duen Behobia-Donostia lasterketaren inoizko jarraipenik handiena eskainiko du igande honetan, azaroaren 10ean, ETB1ek eta baita eitb.eus-ek ere.

09:50ean hasita eta ia lau orduz, lasterketaren nondik norako guztiak jarraituko ditu ETBko kirol talde zabalak. Behobiatik abiatu eta Donostiako Boulevardean amaitzen den 20 kilometrotako lasterketaren ibilbidean egoteaz gainera, hiru puntu garrantzitsutan egongo dira Euskal Telebistako kamera eta kazetariak: Behobiako irteera zirraragarrian, Gaintzurisketako igoeran eta helmugan, une horretako emozio guztiak kontatzeko.

Kirol-lehia ez ezik, karrera jendetsuan parte hartzen duten denetariko talde eta norbanakoen atzean dauden istorioak ere hurbilduko dituzte emanaldian. Anartz Agirre kazetariak eta Etor Mendia adituak egingo dute lasterketaren kontakizuna. Halaber, Iñigo Barrena, Sara Gandara eta Ane Muruamendiaraz kazetariek elkarrizketa eta lekukotasunak bilduko dituzte lasterketa guztian zehar.