EITB Maratoiaren erronka martxan dugu: bidali "Eskutitza" abestiaren bertsioa, eskuekin bihotz bat osatuz

2024ko EITB Maratoia hasi da martxa hartzen. Abenduaren 12an izango da ikerketaren aldeko egun handia; baina, ohi bezala, aurretik, badago aukera dohaintzak* egiteko (BIZUM: 33478) eta, nola ez, kanpaina solidarioarekin bat egiteko. Edizio honetan gaixotasun kardiobaskularretan jarri du arreta EITB Maratoiak, Entzun bihotzari leloarekin; eta Hemendik At taldearen "Eskutitza" abestia da soinu-banda, Maratoiak berak bezala, 25 urte betetzen baititu aurten abesti horrek.

Martin Urrutia eta Leire Martinez abeslari ezagunek euren ahotsak eta eskuak elkartu dituzte EITB Maratoiaren aldeko lankidetza artistiko berezi honetan, eta "Eskutitza" abestiaren bideoklip solidarioa grabatu dute, elkarteetako hainbat kiderekin batera. Bideoklip hori oinarri hartuta, erronka bota digute: "Eskutitza" doinua abestu, dantzatu… eta gure eskuekin bihotz bat osatzea.

Horretarako, EITB Maratoiaren webgunean eskuragarri dago karaoke bertsioa eta letra, eta jada igo daitezke bideoak Zure bertsiorik onena atalera. Bertan argitaratuko dira jasotako bideoak, eta proposamenik original, dibertigarri edo/eta hunkigarrienak EITBko albistegi eta saioetan eskainiko dira azaroaren 12tik aurrera.  

Aurtengoa urte berezia da EITB Maratoiarentzat, 25 urte egingo baitu gaixotasunen aurkako borrokan laguntzen; eta hori guztia, bihotzetik, edizio seinalatu honetan elementu nagusi izango den bihotz handi horretatik.

2:45

2024ko EITB Maratoiaren bideoklipa: ''Eskutitza'' abestiak Leire Martinez eta Martin Urrutia batu ditu

Entzun bihotzari leloarekin, prebentzioan jarri nahi du arreta: Gelditzea; nork bere buruari begiratzea; eta entzutea… Gure bihotzari entzutea; eta elkartasun, batasun eta babes keinua izango da. Gure bihotzari entzuteko deia, beraz, bikoitza: nork bere buruari entzutea, prebentzioa bilatuz; eta gure bihotzei modu kolektiboan entzutea, guztion arteko elkartasuna bultzatzeko.

EITB Maratoia 2024

EITB Maratoiak mende laurdena darama arrazoi batengatik taupadaka: ELKARTASUNA. 2023an markak hautsi zituen parte-hartzean, elkartasunean eta diru-bilketan: 1.230.000 euro baino gehiago minbizia ikertzeko. Urte guzti hauetan, gainera, hiru aldiz gainditu da milioi bat euroko langa, eta gizartearen elkartasunari esker, aurreko 23 edizioetan, 8,56 milioi euro bideratu ahal izan dira 127 ikerketa-proiektutara. Ibilbide ikusgarri horri begira, aurtengoa edizio berezia izango da, lortutako guztia ospatzeko eta eskertzeko.