Aukera berriak ibilgailu elektrikoentzat, aste honetan, "Teknopolis" saioan

Aste honetako "Teknopolis" programan ibilgailu elektrikoen irudia aldarazi dezaketen zenbait esperientzia ezagutuko dituzte. Izan ere, ibilgailu berriekin lotu ohi ditugu ibilgailu elektrikoak, baina bada beste aukerarik. Autoen kasuan, adibidez, retrofit mugimendua dago, errekuntza-motorreko autoak elektriko bihurtzea bilatzen duena; auto "zaharra" elektriko bihurtzea, alegia. Teknikoki posible da, eta Europako legediak aukera ematen du, baina oztopoak ere badira. Aeconve elkartekoekin hitz egingo dute egoeraz.

Adibide baten bila Aretxabaletako Lanbide Heziketako zentrora jo dute; izan ere, han Volkswagen Beetle edo kakalardo klasiko bat egokitzen ari dira elektriko bihurtzeko. Dirua eta denbora behar da, baina, bidean, ikasleak aukera horretan trebatzen dira. 

Dagoeneko elektrifikatuta dagoena Ortze itsasontzia da. Makinen gelara jaitsiko dira bere funtzionamendua ezagutzera: jatorriz diesel motor bat darama, baina motor elektriko bat gehitu diote. Horrela, entxufatu daitekeen itsasontzi elektriko hibrido bihurtu dute. 

Entxuferik ez du behar, aldiz, Mondragon Unibertsitatea garatzen ari den sistemak: ibilgailua gelditu beharrik gabe bateriak kargatzea da asmoa, martxan dabilela. Horretarako ibilgailua eta errepidea bera egokitu beharko dira. 

Aukera berriak ibilgailu elektrikoentzat, aste honetako "Teknopolis" saioan: larunbatean, 13:30ean, ETB1en; eta igandean, 12:15ean, ETB2n. Bi emanaldiak eitb.eus-en ere jarraitu daitezke.