Pintxo Pote
22:15ean
'Pintxo & Pote' saioa Gasteizen izango da gaur gauean
A.H. | EITB
Asier Hormazak eta Andoni Agirregomezkortak Arabako Pintxoaren III. Aste Nagusiko txapelketa ezagutuko dute.
Bideoak (1)
Informazio gehiago (1)
Gaurko 'Pintxo & Pote' saioan, Josema Azpeitiak Asier Hormaza eta Andoni Agirregomezkorta Gasteizera bidaliko ditu, Arabako Pintxoaren III. Aste Nagusiko txapelketa ezagutzera.
Hasteko, Asier Hormaza Eginoko Las Ventas jatetxera joango da Euskal Herriko patata-tortillarik onena jatera. Bertako nagusiarekin, Santi Aizpeolearekin, eta patata hornitzailearekin, Meltxor Saez de Ibarrarekin, izango da han, tortilla nola egiten den ikasteko.
Andoni, bitartean, Gasteizera joango da, Gorka Aginagalderekin egotera. Gorkak kuttuna duen Parral tabernara eramango du pote bat hartzera, eta baita Jalas-leku tabernara ere, bertako ostrak dastatzera.
Jarraian, Asierrek Eneko Llanos triatloilaria topatuko du kalean, eta Harri tabernara joango dira. Hango nagusiarekin, Jose Miguel Urdangarinekin, lehiaketako bi pintxoak prestatuko dituzte.
Gorka Urtiz de Urbinarekin, Zeledonekin, PerretxiCo tabernara joango da gero Andoni, eta txapelketako bi pintxoak prestatuko ditu Josu Iglesias sukaldariarekin.
Asier El Pregon tabernan egongo da segidan, eta Ramon Ibeasekin lehiaketarako bi pintxoak dastatu ondoren, Brigidetako komentuko baratzea ikustera joango dira.
Andoni Aitor Buendiarekin batuko da jarraian, Santa Barbara merkatua ezagutzeko eta han postua duten bi ekoizlerekin izango dira.
Asierrek Bittor Rodrigez ezagutuko du, eta Idiazabal gazta dastatuko dute EHUko analisi sentsorialeko laborategian.
Asier eta Andoni txapelketan parte hartzen duten beste hainbat tabernatan egongo dira: Izaga jatetxea, El portalon, Gasteiz Bi... Ondoren, Mikel Urdangarin kantariaren tabernara joango dira, eta abeslariarekin eta Iker Pou eskalatzailearekin egongo dira.
Amaitzeko, bi aurkezleak Mendizorrotzako Ostalaritza Eskolan egingo den Arabako Pintxoen 3. Aste Nagusiko finalera joango dira. Programa Gasteizko Aiztogile kaleko giroan bukatuko da, bertako hainbat tabernatan.
'Pintxo & Pote' astearte gauetan izaten da ikusgai, 22:15etik aurrera, ETB1en eta eitb.eus-en.
us-en.