Gure Kasa
22:30ean
Itxialdi egoeran lanean aritzeaz, gaur gauean, "Zuen Kasatik, Gure Kasara" saioan
EiTB
Hainbat ogibidetan lan egiten dutenen egoera erakutsiko digute Julen eta Antton Telleria anaiek, Zuriñe Tolonegrok eta Jon Plazaolak. "Txoria txori" abestiaren bertsioak ere izango dira ikusgai.
-
Hainbat ikusle "Txoria txori" abesten. EiTBko bideo batetik ateratako irudia
Gaurko "Zuen Kasatik, Gure Kasara" saioan, itxialdi egoeran lanean jarraitu dutenak izango dira protagonista. Julen eta Antton Telleria, Zuriñe Tolonegro eta Jon Plazaola arituko dira aurkezle lanetan, eta une berezi honetan zenbait lanbideren egoera erakutsiko digute: online arropa-denda bat, "Egunean behin" aplikazioa eta beilatoki bateko arduradunaren lana (Mikel Idoate pilotari ohia da azken hori).
Kolaboratzaileek ere izango dute beraien tartea. Jon Garate Garate Kids atalarekin itzuliko da eta haurrak antzezten jarriko ditu; Marta Elvirak Euskal Herriko balkoien berri emango digu Balkoteoa atalean, eta Onintza Enbeita eta Maddalen Arzallus bertsotan eta kantuan arituko dira.
Ikusleak ere agertuko dira pantailan; izan ere, Euskal Herriko txoko ezberdinetatik iritsitako "Txoria txori" abestiaren bertsioak izango dira ikusgai. Parte hartu nahi duenak gurekasa@eitb.eus helbidera edo 655 28 34 27 WhatsApp zenbakira bidal ditzake bideoak.
Jon Plazaolak bideo xelebreak grabatzen eta erakusten segituko du.
"Zuen Kasatik, Gure Kasara" ostegunetan izaten da ikusgai, 22:30ean, ETB1en eta eitb.eus-en.
